AAJ SAAL KI AAKHRI RAAT HAI

Mujhe yaad hai
pichle saal inhi dinoun main
main ne tumhain apne andar
saatween baar qatal kar k waheen kaheen
kisi weeraane main dafan kia tha
or tumhaari qabar
faramoshi k bhaari patharoun se bhar di thi

or us se pehle aik baar
door daraaz s aaney waale kisi dev-heekal
parinde k pairoun se
tujhae baandh kar urha dia tha
or phir us se bhi pehle inhi dinoun main
main ne tumhain mukammal taur par jala kar
tumhaari raakh aik taiz raftaar daryaa main
bahadi thi..

Lakin is saari jaan kaahi k bawajood tum aaj phir
hamaisha ki tarah meri aankhoun main aankhain daale
meray dil ko apni muthi main jakrhey
mere saamne khare ho!!