Mujhe yaad hai
pichle saal inhi dinoun main
main ne tumhain apne andar
saatween baar qatal kar k waheen kaheen
kisi weeraane main dafan kia tha
or tumhaari qabar
faramoshi k bhaari patharoun se bhar di thi

or us se pehle aik baar
door daraaz s aaney waale kisi dev-heekal
parinde k pairoun se
tujhae baandh kar urha dia tha
or phir us se bhi pehle inhi dinoun main
main ne tumhain mukammal taur par jala kar
tumhaari raakh aik taiz raftaar daryaa main
bahadi thi..

Lakin is saari jaan kaahi k bawajood tum aaj phir
hamaisha ki tarah meri aankhoun main aankhain daale
meray dil ko apni muthi main jakrhey
mere saamne khare ho!!

» Read More...

Abhi kuch pul hamarey haath main hain
kon jaane
kon sa lamha hamare haath se phisle, gire
or paoon ki zanjeer ho jaye
abhi yeh din jo lagta hai k hum ik doosry k saath
reh sakte hain pal do pal
najaane kub kahan deewaar bun jaye
abhi do chaar saansain buch rahi hain
yeh to jhaunka hain
kisey maloom kis aahistagi say yoon guzar jayay
k hum daryaoun k do mukhtalif na'aashna goongey kinaaroun par
kharey
ik doosrey ki shakal takney ko taras jayain
meri awaaz teri yaad main zinda hou bus
or main teri tasweer aankhoun main liyey rona chupaoon
shehar waaloun say
abhi kuch pul hamare haath main hain
hum jo chahain gain to kuch kum kum bhi mil lain gain
magar jaane kahan.... ?
kub... ?
kon sa lamha....?

» Read More...

Din Museebat Ke Tal Gaye Hotay
Apna Rasta Badal Gaye Hotay

Dil Ki Wehshat Ne Barh Ke Ghair Lya
Warna Aagay Nikal Gaye Hotay

Tere Gham Ne Qadam Ukhair Dye
Warna Kab Ke Sambhal Gaye Hotay

Tum Ne Loogon Ko Kiun Tawajja Di ?
Apne Hee Aap Jal Gaye Hotay

Shukar Hai Hum Nahi Hain Din Warna
Shaam Ke Waqt Dhal Gaye Hotay

» Read More...